Athbhreithniú i dteannta scoileanna

Taighde chun tacú le timthriall a haon 

Dúshláin le haghaidh na sraithe sinsearaí 

• Banks agus Smyth

Dírítear i gcuid mhór den taighde a rinneadh ar an tsraith shinsearach ar na dúshláin atá os comhair scoláirí ar an leibhéal seo. Tarraingítear aird ar strus agus imní mar phríomhdheacrachtaí a bhíonn ag scoláirí agus iad ag teacht i dtreo dheireadh an dara leibhéal. Luaitear i roinnt taighde go bhfuil tábhacht agus críochnaitheacht an mheasúnaithe ar cheann de na príomhghnéithe a théann i bhfeidhm ar leibhéil struis na scoláirí, ach luaitear sa taighde céanna go bhfuil idirghníomhaíocht idir scoláire agus múinteoir, caidreamh le comhscoláirí, rogha cláir agus roghanna ábhar ina bpríomhchomharthaí de strus freisin. 

• Predictability in the Irish Leaving Certificate

Tugtar breac-chuntas sa staidéar seo (Baird, Hofenbeck, Elwood, Caro & Ahmed, 2014) ar na heispéiris dhifriúla a bhíonn ag múinteoirí agus scoláirí ar an Ardteistiméireacht. Cé go raibh taithí na múinteoirí srianta ag a réimse ábhair, bhí raon leathan éileamh ar na scoláirí thar a n-ábhair ar fad. Baineadh de thátal as go gcruthaíonn an teannas seo laistigh d'ábhair agus thar ábhair cúngú ar an gcuraclam agus go dtreisítear an teagasc don tástáil. 

• Entry to Higher Education in Ireland in the 21^stcentury

Tugtar breac-chuntas sa staidéar seo ar chuid de na héifeachtaí iarmharta de bharr pointí CAO ar theagasc agus foghlaim ar an dara leibhéal. Tá cúngú an churaclaim agus cónaidhmiú thaithí na sraithe sinsearaí leis na torthaí, agus pointí, a fhaightear sa scrúdú tar éis cohórt scoláirí a chruthú nach bhfuil ullmhaithe don ardoideachas. Cuirtear i leith an chórais freisin gur theip air réiteach fadhbanna agus foghlaim neamhspleách a chothú.

Ag féachaint ar dhlínsí eile 

• Taighde idirnáisiúnta

Tá taighde ar sholáthar oideachas meánscolaíochta sinsearaí i réimse dlínsí tar éis cosúlachtaí áirithe a nochtadh i dtéarmaí aidhmeanna agus chuspóirí na céime seo den oideachas. Sa Fhrainc, trí na trí chonair atá ar fáil (ginearálta, teicniúil agus gairmiúil), tá sé d’aidhm ag oideachas meánscolaíochta sinsearaí freagairt do bhuanna ar leith na scoláirí aonair agus dá bhrí sin cabhrú leo a gcumas a bhaint amach. 

San Fhionlainn, is é aidhm na céime seo den oideachas an t-eolas agus na scileanna a thabhairt do scoláirí a theastaíonn le tabhairt faoi thuilleadh staidéir agus saol na hoibre, ach tá sé d’aidhm aige freisin a chur ar chumas na scoláirí tairbhe a bhaint as foghlaim ar feadh an tsaoil agus ról daonlathach, freagrach agus gníomhach a ghlacadh mar chuid de phobal áitiúil, náisiúnta, Eorpach agus domhanda.  

Ag breathnú chun cinn 

• OECD

Tá roinnt príomhscileanna i réimse dlínse a bhfuil d’aidhm ag a gcuraclaim iad a leabú sa chéim seo den oideachas. Sainaithníonn an OECD trí phríomhdhúshlán don tsochaí: dúshláin gheilleagracha, shóisialta agus chomhshaoil. Chun aghaidh a thabhairt ar na dúshláin sin, teastóidh tacar scileanna, meonta agus inniúlachtaí níos leithne ó na scoláirí lena n-áirítear: scileanna cognaíocha agus meiteachognaíocha; scileanna sóisialta agus mothúchánacha; scileanna praiticiúla agus fisiciúla. 

• An Fóram Eacnamaíoch Domhanda 

Scrúdaigh an Fóram Eacnamaíocht Domhanda treochtaí in éabhlóid an lucht saothair agus, de bharr nádúr athraithe an lucht saothair, thug sé le fios go bhfuil an cumas dul faoi athoiliúint agus uas-sciliú go héifeachtach le haghaidh saol oibre éagsúil agus athraitheach ar cheann de na príomhghnéithe a chuirfidh le fostaíocht rathúil.